របៀបធ្វើបរមាធិប្បាយ

ដកស្រង់ចេញពី សៀវភៅ នីតិព្រហ្មទណ្ឌទូទៅ បោះពុម្ភលើកទី២ រៀបរៀងដោយ សាស្រ្តាចារ្យ រុន ពណ្ណារិទ្ធ ២០១២

របៀបធ្វើបរមាធិប្បាយ

បរមាធិប្បាយជាវិធីសាស្ត្រមួយអនុញ្ញាតឲ្យនិស្សិតពន្យល់ឲ្យបានច្បាស់ លាស់ពីចំណេះដឹងទាំងឡាយដែលខ្លួនមាន។ ប៉ុន្តែការបញ្ចេញចំណេះដឹង ត្រូវតែគោរពទៅតាមរបៀបលំដាប់មួយជាក់លាក់ ដោយនិស្សិតត្រូវចេះរៀបចំគំនិតរបស់ខ្លួនឲ្យបានសមរម្យ និង តាមលំដាប់លំដោយមានលក្ខណៈតក្កវិជ្ជា។

ដើម្បីធ្វើបរមាធិប្បាយមួយឲ្យបានល្អ និស្សិតចាំបាច់ត្រូវតែគោរពដំណាក់កាលដូចខាងក្រោម ៖

- អានប្រធានបទ ៖ និស្សិតត្រូវអានប្រធានឲ្យបានច្បាស់លាស់ និង ពិនិត្យពិច័យទៅលើពាក្យពេចន៍នីមួយៗដែលបានប្រើប្រាស់ក្នុងប្រធានបទ។ និស្សិតត្រូវព្យាយាមយល់ពីអត្ថន័យនៃប្រធានបទអ្វីដែលគេចង់ឲ្យនិស្សិតធ្វើបរមាធិប្បាយឲ្យពិតប្រាកដ។

- ផ្តល់និយមន័យលើពាក្យគន្លឹះ ៖ និស្សិតត្រូវកំណត់មើលថា តើពាក្យណាដែលជាពាក្យគន្លឹះ ហើយកំណត់និយមន័យឲ្យបានច្បាស់លាស់តាមចំណេះដឹងដែលនិស្សិតមាន។

- ការប្រមូលចំណេះដឹងផ្សេងៗ ៖ និស្សិតត្រូវប្រមែប្រមូលចំណេះដឹងទាំងឡាយដែលខ្លួនមាន ហើយដែលពាក់ព័ន្ធនឹងប្រធានទាំងអស់ កត់ចំណាំលើក្រដាស ព្រាង។

- ការតាក់តែងប្លង់ ៖ ការតាក់តែងប្លង់ត្រូវធ្វើឡើងដោយឆ្លុះបញ្ចាំងពីលំដាប់លំដោយនៃគំនិត។ គេអាចតាក់តែងប្លង់ជាពីរផ្នែក ឬច្រើនផ្នែកបាន អាស្រ័យទៅតាមចំនួនគំនិតមាននៅក្នុងប្រធានបទ។

- ការសរសេរបរមាធិប្បាយ ៖ បរមាធិប្បាយត្រូវសរសេរតាមរបៀបដូចតទៅ ៖

សេចក្តីផ្តើម៖ ត្រូវធ្វើឡើងក្នុងលក្ខណៈជាសាជីជ្រុង ដោយចាប់ផ្តើមពីអ្វីដែលមានលក្ខណៈទូទៅ (លំនាំបញ្ហា) រួចចូលអ្វីដែលមានលក្ខណៈពាក់ព័ន្ធនឹងប្រធាន បទ (ចំណូលបញ្ហា) ដោយពុំភ្លេចពន្យល់ពាក្យគន្លឹះរបស់ប្រធានបទឡើយ។ បន្ទាប់មកទៀតនិស្សិតត្រូវធ្វើការប្រកាសប្លង់បានសេចក្តីថា ធ្វើការប្រកាសគំនិតទាំងប៉ុន្មានដែលខ្លួននឹងធ្វើអត្ថាធិប្បាយនៅខាងក្រោម។

តួសេចក្តី៖ និស្សិតត្រូវពន្យល់ និង អត្ថាធិប្បាយគំនិតរបស់ខ្លួនទៅតាមប្លង់ដែលបានរកឃើញ។ ត្រង់ចំនុចនេះ និស្សិតពុំត្រូវធ្វើឃ្លាភ្ជាប់សេចក្តីឡើយ មុននឹងឆ្លងពីគំនិតមួយទៅពន្យល់គំនិតមួយទៀត។

សេចក្តីសន្និដ្ឋាន៖ និស្សិតអាចធ្វើសេចក្តីសន្និដ្ឋានក៏បានប្រសិនបើខ្លួនមានគំនិតថ្មី។ ប្រសិនបើនិស្សិតពុំមានគំនិតអ្វីថ្មីទេនិស្សិតពុំចាំបាច់ធ្វើសេចក្តីសន្និដ្ឋានឡើយ។

Milan Tomic

Hi. I’m Designer of Blog Magic. I’m CEO/Founder of ThemeXpose. I’m Creative Art Director, Web Designer, UI/UX Designer, Interaction Designer, Industrial Designer, Web Developer, Business Enthusiast, StartUp Enthusiast, Speaker, Writer and Photographer. Inspired to make things looks better.