លោកកឹមសុខា ប្រកាសបង្កើតមជ្ឈមណ្ឌលកត់ត្រាព្រឹត្តិការណ៍ឧក្រិដ្ឋកម្ម នៅកម្ពុជា

លោកកឹម សុខា ក្នុងសន្និសីទកាសែតមួយកាលពីពេលកន្លងទៅ

Siv Channa/RFI

ដោយ លី ម៉េងហួរ
ក្នុងពិធីរម្លឹកខួបថ្ងៃ៥-៦កក្កដា ឆ្នាំ១៩៩៧ នាព្រឹកថ្ងៃសៅរ៍នេះ លោកកឹមសុខា ប្រធានស្តីទីគណបក្សសង្គ្រោះជាតិ បានប្រកាសបង្កើតមជ្ឈមណ្ឌលកត់ត្រាព្រឹត្តិការណ៍ឧក្រិដ្ឋកម្ម នៅកម្ពុជា។ ជាកន្លែងសម្រាប់កត់ត្រា និងតម្កល់នូវឯកសារនៃអំពើឧក្រិដ្ឋកម្ម ចាប់ពីឆ្នាំ១៩៩៣ ពាក់ព័ន្ធនឹងរដ្ឋាភិបាល ដែលដឹកនាំដោយគណបក្សប្រជាជនកម្ពុជា។ លោកកឹមសុខា បានប្រកាសថា ការបង្កើតមជ្ឈមណ្ឌលឯកសារនេះ ដើម្បីបំបាត់វប្បធម៌និរទណ្ឌភាព នៅកម្ពុជា។

សេចក្ដីរាយការណ៍ដោយ លី ម៉េងហួរ

ស្តាប់ (02:27)

05/07/2014

ដើម្បីបញ្ចប់វប្បធម៌និទណ្ឌភាព ដែលអ្នកប្រព្រឹត្តិល្មើស មិនត្រូវបានកាត់ទោស នៅក្នុងប្រទេសកម្ពុជា លោកកឹមសុខា បានប្រកាសពីការផ្តួចផ្តើមយន្តការមួយ ដោយបង្កើតមជ្ឈមណ្ឌលកត់ត្រាព្រឹត្តិការណ៍ឧក្រិដ្ឋកម្ម នៅកម្ពុជា ចាប់ពីឆ្នាំ១៩៩៣។
ក្នុងពិធីរម្លឹកខួប ១៧ ឆ្នាំ ថ្ងៃ៥-៦កក្កដា ឆ្នាំ១៩៩៧ កាលពីព្រឹកមិញ លោក កឹមសុខា បានលើកឡើងថា មជ្ឈមណ្ឌលកត់ត្រាព្រឹត្តិការណ៍ឧក្រិដ្ឋកម្មនោះ មានទីតាំងនៅក្រៅប្រទេស ហើយកត់ត្រា និងផ្ទុកឯកសារពាក់ព័ន្ធនឹងអំពើឧក្រិដ្ឋសម្លាប់មនុស្ស នៅកម្ពុជា ចាប់ពីឆ្នាំ១៩៩៣ រួមមាន៖ ព្រឹត្តិការណ៍ផ្ទុះអាវុធថ្ងៃ៥-៦កក្កដា ឆ្នាំ១៩៩៧ ព្រឹត្តិការណ៍ផ្ទុះគ្រាប់បែក ថ្ងៃ៣០មីនា ឆ្នាំ១៩៩៨ ការសម្លាប់លោកជាវិជ្ជានៅឆ្នាំ២០០៤ រួមទាំងព្រឹត្តិការណ៍បង្ក្រាប បាញ់សម្លាប់កម្មកររោងចក្រ នៅថ្ងៃទី២ និងថ្ងៃទី៣មករា ឆ្នាំ២០១៤ ក៏ត្រូវបានរាប់បញ្ចូលផងដែរ។

អំពើឧក្រិដ្ឋទាំងនោះ ត្រូវបានលោកកឹមសុខា លើកឡើងថា ពាក់ព័ន្ធនឹងរដ្ឋាភិបាល ក្រោមការដឹកនាំរបស់លោកនាយករដ្ឋមន្ត្រី ហ៊ុន សែន។

លោក កឹមសុខា អះអាងថា គំនិតផ្តួចផ្តើមរបស់លោកដូច្នេះ ត្រូវបានធ្វើឡើង ដោយយកលំនាំតាមប្រទេសកូរ៉េខាងត្បូង ដែលលោកបានទៅសិក្សាស្វែងយល់កាលពីពេលថ្មីៗនេះ។
តាមមេដឹកនាំបក្សប្រឆាំង មជ្ឈមណ្ឌលកត់ត្រាអំពើឧក្រិដ្ឋកម្មនៅកម្ពុជា ចាប់ពីឆ្នាំ១៩៩៣ មិនមែនជាការកុំគួនលើជនណាទេ តែដើម្បីកុំឲ្យអំពើឧក្រិដ្ឋកម្ម កើតឡើងទៀត នៅកម្ពុជា។ ម្យ៉ាងក៏ដើម្បីបំបាត់វប្បធម៌រួចទោស ហើយទុកជាឯកសារដល់កូនចៅជំនាន់ក្រោយ ដើម្បីស្វែងយល់។

ក្នុងការរម្លឹកព្រឹត្តិការណ៍ផ្ទុះអាវុធ ដែលគណបក្សប្រឆាំង ហៅថាជារដ្ឋប្រហារ ដណ្តើមអំណាច រវាងអតីតនាយករដ្ឋមន្ត្រីទី២ លោកហ៊ុនសែន ពីអតីតនាយករដ្ឋមន្ត្រីទី១ ព្រះអង្គម្ចាស់នរោត្តម រណឫទ្ធិ កាលពីព្រឹកមិញ លោកកឹមសុខា ក៏បានបង្ហាញសុឆន្ទៈដើម្បីដោះស្រាយបញ្ហានយោបាយ ហើយអំពាវនាវដល់គណបក្សប្រជាជនកម្ពុជា ដោះស្រាយបញ្ចប់ជម្លោះនយោបាយ ឲ្យបានមុនខួបមួយឆ្នាំ នៃការបោះឆ្នោត នាថ្ងៃទី២៨កក្កដាខាងមុខ។

ប៉ុន្តែលោកកឹមសុខា មិនបានបង្ហាញរូបមន្តថ្មី ក្រៅពីជំហររបស់គណបក្សសង្គ្រោះជាតិ ប្រកាន់យករូបមន្ត ២ ភាគ ៣ ដើម្បីជ្រើសរើសសមាជិកគជប ខណៈដែលគណបក្សប្រជាជនកម្ពុជា នៅតែប្រកាន់យកសំឡេង ៥០ ភាគរយបូក១៕

Milan Tomic

Hi. I’m Designer of Blog Magic. I’m CEO/Founder of ThemeXpose. I’m Creative Art Director, Web Designer, UI/UX Designer, Interaction Designer, Industrial Designer, Web Developer, Business Enthusiast, StartUp Enthusiast, Speaker, Writer and Photographer. Inspired to make things looks better.