ទស្សនៈអ្នកវិភាគជុំវិញការលើកឡើងរបស់មន្ត្រីស្ថានទូតវៀតណាមថា ទឹកដីកម្ពុជាក្រោមជារបស់ខ្លួន

ដោយ៖ ឡាយ សាមាន | ថ្ងៃអង្គារ ទី8 កក្កដា 2014, 11:59 AM, (1)

ស្តាប់សំឡេង៖

នៅព្រឹកថ្ងៃអង្គារនេះ ក្រុមនិស្សិត និងព្រះសង្ឃជាង១០០អង្គ/នាក់ បានប្រមូលផ្តុំនៅមុខស្ថានទូតវៀតណាម ដើម្បីទាមទារឲ្យវៀតណាមសុំទោសប្រជាជនកម្ពុជាជាសាធារណៈ ចំពោះការដែលមន្ត្រីទូតនេះ ថ្លែងកាលពីដើមខែមិថុនាថា ទឹកដីកម្ពុជាក្រោមជារបស់វៀតណាម តាំងពីយូរមកហើយ មិនមែនបារាំងកាត់ចេញពីកម្ពុជាទេ។

ទាក់ទងនឹងការលើកឡើងនេះ អ្នកស្រាវជ្រាវពីការអភិវឌ្ឍសង្គម លោក កែម ឡី យល់ថា ជារួមប្រទេសមួយតែងតែការពារអធិតេយ្យភាពខ្លួន តែការគិតពីប្រយោជន៍ជាតិហួសហេតុ ឬជ្រុលនិយមអាចធ្វើឲ្យមានកំហឹងជាតិសាសន៍។ លោកថា វៀតណាមតែងតែបំភ្លៃប្រវត្តិសាស្ត្រខ្មែរ ដូចនេះពលរដ្ឋខ្មែរ មិនត្រូវនៅស្ងៀមទេ គឺត្រូវតែចងក្រងឯកសារប្រវត្តិសាស្ត្រខ្លួនឯង « ខ្ញុំគិតថាជាកាយវិការល្អហើយ សិទ្ធិធ្វើបាតុកម្មកូដកម្ម សិទ្ធិជាមូលដ្ឋាន ហើយចែងនិងច្បាប់ជាតិទៅទៀត។ ការហាមឃាត់មិនឲ្យធ្វើបាតុកម្មកូដកម្មគឺជាបទល្មើសដែលកើតឡើងដោយ អាជ្ញាធរ។ បាទជាដំបូងមិនយូរមិនឆាប់ឲ្យតែខ្មែរយើងយុវជនយើង យល់ដឹងច្រើនអំពីប្រវត្តិសាស្ត្រ យល់ដឹងច្រើនអំពីព័ត៌មាន ហើយធ្វើបាតុកម្មកូដកម្មរដ្ឋាភិបាលគង់តែដួលរលំទេ»។

ជាងនេះទៀត លោកកែម ឡី ថារដ្ឋាភិបាលគួរតែបញ្ចូលប្រវត្តិនៃការបាត់ទឹកដីកម្ពុជា ទៅក្នុងកម្មវិធីសិក្សារបស់សិស្ស ហើយត្រូវបង្កើតមជ្ឈមណ្ឌល សម្រាប់រក្សាទុកឯកសារប្រវត្តិសាស្ត្រនេះ ដើម្បីទុកឲ្យកូនខ្មែរជំនាន់ក្រោយបានដឹង។

ប្រធានអង្គការស្រាវជ្រាវជាតិកម្ពុជា លោក ហ៊ាង រិទ្ធី មានប្រសាសន៍ថា ក្នុងនាមលោកជាកូនខ្មែរមួយរូបដែរ មិនសុខចិត្តចំពោះការលើកឡើងរបស់មន្ត្រីស្ថានទូតវៀតណាមដែលថាទឹកដី កម្ពុជាក្រោមជារបស់វៀតណាមនោះទេ។ លោកសង្កត់ធ្ងន់ថា ទឹកដីកម្ពុជាទើបតែបាត់ចំនួន៦៥ឆ្នាំ ក្នុងសម័យអណានិគមបារាំងគ្រប់គ្រងប៉ុណ្ណោះ «តាមការពិតទឹកដី ខ្មែរក្រោមត្រូវប្រគល់ឲ្យខ្មែវិញ មិនដូចមន្ត្រីទូតរបស់យួនបំលែង វាអាចបំលែងបានតែមាត់របស់វា ប៉ុន្តែកូនខ្មែរទាំងខ្មែរក្រោមខ្មែកណ្តាលខ្មែរលើបានដឹងយ៉ាងច្បាស់ ថាទឹកដីនេះជាទឹកដីដូនតារបស់ខ្មែរតាំងពីយូរលង់មកហើយ»។

លោក ហ៊ាង រិទ្ធី បន្ថែមថា ការពិតទឹកដីកម្ពុជាក្រោមជារបស់ខ្មែរតាំងពីដូនតាមក ដូចនេះរដ្ឋាភិបាលគួរតែស្នើសុំទៅអង្គការសហប្រជាជាតិប្តឹងសើរើសុំ ប្រកាសឯករាជ្យ។

ចំណែកអ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន មានប្រសាសន៍ថា តាមច្បាប់អន្តរជាតិ មន្ត្រីស្ថានទូតដែលតាំងនៅលើប្រទេសដទៃមានសិទ្ធិគ្រប់គ្រាន់ក្នុង ការចេញវាចារ។ លោកថា ពលរដ្ឋខ្មែរត្រូវស្វែងរកឯកសារប្រវត្តិសាស្ត្រ ដើម្បីពង្រឹងការយល់ដឹងរវាងប្រជាជាតិទាំងពីរ ហើយមិនត្រូវប្រើអំពើហិង្សាឡើយ។ លោក ផៃ ស៊ីផាន ព្រមានថា វិធានការរបស់រដ្ឋាភិបាល នឹងផ្អាករាល់សកម្មភាពណា ដែលប៉ះពាល់ដល់សណ្តាប់ធ្នាប់សង្គម ហើយរំលោភច្បាប់ជាតិ និងអន្តរជាតិ «នៅក្នុងចំណាត់ការនេះយើងសុំឲ្យគេរក្សាភាពថ្លៃថ្នូរនៃ ប្រជាជាតិកម្ពុជា ហើយយើងសុំឲ្យគេចូលរួមសហការជាមួយរាជរដ្ឋាភិបាលនៅអ្វីដែលយើងបាន ប្តេជ្ញានៅក្នុងរដ្ឋធម្មនុញ្ញរបស់យើងដូចជាច្បាប់ជាតិច្បាប់ អន្តរជាតិ ព្រោះយើងជាសមាជិកនៃអង្គការសហប្រជាជាតិ»។

បើតាមក្រុមអ្នកវិភាគ រដ្ឋាភិបាលកម្ពុជាមិនគួរនៅស្ងៀមស្ងាត់ទេ គួរតែមានវិធានការផ្សេងៗ ចំពោះការលើកឡើងរបស់មន្ត្រីស្ថានទូតវៀតណាម ហើយត្រូវតែគិតពីផលប្រយោជន៍ជាតិខ្លួន ជាជាងគិតប្រយោជន៍ប្រទេសដទៃ៕

Milan Tomic

Hi. I’m Designer of Blog Magic. I’m CEO/Founder of ThemeXpose. I’m Creative Art Director, Web Designer, UI/UX Designer, Interaction Designer, Industrial Designer, Web Developer, Business Enthusiast, StartUp Enthusiast, Speaker, Writer and Photographer. Inspired to make things looks better.