សង្គមស៊ីវិលថាប្រធាន គជប មិនគួររើសចេញពីគណបក្សណាមួយឡើយ

ដោយ៖ តាំង វីដា | ថ្ងៃព្រហស្បតិ៍ ទី24 កក្កដា 2014 | 53 នាទី មុន

អង្គការសង្គមស៊ីវិលធ្វើការលើការបោះឆ្នោតយល់ថា ប្រធាន គជប គួរជាសមាសភាព១រូប ដែលត្រូវបានកំណត់ជ្រើសរើសដោយការព្រមព្រៀងរបស់គណបក្សទាំងពីរ។

ក្នុងជំនួបចរចាកំពូលកាលពីថ្ងៃទី២២ ខែកក្កដា គណបក្សជាប់ឆ្នោតទាំងពីរ បានឯកភាពគ្នាធ្វើកំណែទម្រង់ការបោះឆ្នោត ដោយរៀបចំឲ្យស្ថាប័នរៀបចំការបោះឆ្នោត មានចែងក្នុងជំពូកមួយដោយឡែក ក្នុងរដ្ឋធម្មនុញ្ញ ហើយសមាសភាព គជប មាន ៩រូប ក្នុងនោះ ៤រូប ជ្រើសរើសដោយគណបក្សដឹកនាំរដ្ឋាភិបាល ៤រូប ដោយគណបក្សមានអាសនៈក្នុងសភា ដែលមិនចូលរួមរដ្ឋាភិបាល និង១រូបទៀត ជ្រើសរើសដោយការព្រមព្រៀងរបស់គណបក្ស។

តាមរយៈរូបមន្តនេះ នាយកប្រតិបត្តិអង្គការឃ្លាំមើលការបោះឆ្នោតហៅកាត់ថា និចហ្វិច លោក ហង្ស ពុទ្ធា យល់ថា សមាសភាព១រូប ដែលត្រូវបានកំណត់ជ្រើសរើសដោយការព្រមព្រៀងរបស់គណបក្សទាំងពីរនេះ គួរមានតួនាទីជាប្រធាន គជប តែម្តង និងជាបុគ្គលឯករាជ្យម្នាក់ ក្រោមការជជែក និងយោគយល់គ្នារវាងគណបក្សទាំងពីរ។ លោកថា ប្រធាន គជប គួរកើតចេញពីការបោះឆ្នោតជ្រើសរើសដោយគណៈកម្មការចម្រុះមួយ មានគ្រប់ភាគីចូលរួម ទើបអាចធានានូវឯករាជ្យភាពនៃប្រព័ន្ធបោះឆ្នោតបានក្នុងរយៈពេលវែង។

នាយកប្រតិបត្តិអង្គការខុមហ្វ្រែល លោក គល់ បញ្ញា យល់ថា ប្រធាន គជប មានតួនាទីសំខាន់ក្នុងការធ្វើសេចក្តីសម្រេច ហេតុដូចនេះ គណបក្សទាំងពីរ គួរជជែកគ្នាលម្អិត កំណត់ពីលក្ខណៈនៃការជ្រើសរើសប្រធាន គជប ដែលមិនស្ថិតក្រោមនិន្នាការរបស់គណបក្សណាមួយ។ លោកបន្តថា ក្នុងករណីដែលគណបក្សទាំងពីរ មិនអាចស្វែងរកការឯកភាពរួម ឬពិបាកក្នុងការជ្រើសរើសប្រធាន គជប នោះ វិធីសាស្ត្រដែលល្អដើម្បីធានាតម្លាភាព គឺការកាត់បន្ថយសិទ្ធិអំណាចរបស់ប្រធាន គជប និងការបង្កើនតួនាទី និងវិជ្ជាជីវៈសមាជិកទាំង៩នាក់ ប្រកបដោយអព្យាក្រឹត្យភាព មិនពាក់ព័ន្ធនឹងគណបក្សនយោបាយ។

សម្រាប់ប្រធានផ្នែកស៊ើបអង្កេតនៃសមាគមការពារសិទ្ឋិមនុស្សអាដហុក លោក នី ចរិយា យល់ថា ការជ្រើសរើសបុគ្គលមានវិជ្ជាជីវៈ បច្ចេកទេសក្នុងការបោះឆ្នោត ហើយមានការទទួលស្គាល់ពីសហគមន៍អន្តរជាតិ អាចជាជម្រើសល្អមួយ សម្រាប់គណបក្សទាំងពីរ ក្នុងការពិចារណា ជាជាងការជ្រើសរើសពីភាគីគណបក្សណាមួយ ដែលនាំឲ្យការអនុវត្តការងារ រងនូវសម្ពាធនយោបាយ។

អង្គការសង្គមស៊ីវិលក៏បានស្នើថា ដើម្បីជ្រើសរើសបានប្រធាន គជប ជាបុគ្គលឯករាជ្យ មានលក្ខណៈសម្បត្តិពេញលេញ ដែលអាចធានានូវអព្យាក្រឹត្យភាព និងការសម្រេចក្នុងស្ថាប័ននេះបាន លុះណាតែគណបក្សជាប់ឆ្នោតទាំងពីរ បង្កើនការយោគយល់គ្នា។

ពាក់ព័ន្ធនឹងការជ្រើសរើសប្រធានគជបនេះ មន្ត្រីជាន់ខ្ពស់ប្រជាជនកម្ពុជា លោក ព្រុំ សុខា ឲ្យដឹងថា គណបក្សទាំងពីរ មិនទាន់បានពិភាក្សានៅឡើយទេ។ លោកថា សមាសភាពប្រធានគជប នឹងត្រូវពិចារណា លុះណាតែគណបក្សសង្គ្រោះជាតិ ចូលសភា ហើយធ្វើវិសោធនកម្មរដ្ឋធម្មនុញ្ញជាមុនសិន ទើបដំណើរការនីតិវិធីនៃកំណែទម្រង់ គជប អាចដំណើរការបាន។

ជុំវិញភាពមិនប្រក្រតីនៃលទ្ធផលបោះឆ្នោតថ្នាក់ជាតិ នីតិកាលទី៥ ថ្ងៃទី២៨ ខែកក្កដា ឆ្នាំ២០១៣ គណៈកម្មាធិការជាតិរៀបចំការបោះឆ្នោត បានរងការរិះគន់ពីសង្គមស៊ីវិលជាតិ និងអន្តរជាតិ ពាក់ព័ន្ធនឹងដំណើរការការងារ ដោយសារសមាសភាពនៃគជប គឺកើតចេញពីគណបក្សនយោបាយតែមួយ។

Milan Tomic

Hi. I’m Designer of Blog Magic. I’m CEO/Founder of ThemeXpose. I’m Creative Art Director, Web Designer, UI/UX Designer, Interaction Designer, Industrial Designer, Web Developer, Business Enthusiast, StartUp Enthusiast, Speaker, Writer and Photographer. Inspired to make things looks better.