កម្ពុជាមានតុល្យភាពស្បៀងជាអង្ករប្រមាណជិត៣លានតោន

ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី៥ មេសា បានប្រកាសថា សម្រាប់ឆ្នាំ២០១០ កម្ពុជាមានតុល្យភាពស្បៀងជាអង្ករនៅសល់ប្រមាណ ២,៥លានតោន។

ដោយ អ៊ុក សាវបូរី
2011-04-06

h040511ob

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ក្នុងសន្និបាតបូកសរុបការងារកសិកម្ម រុក្ខាប្រមាញ់ និងនេសាទ ឆ្នាំ២០១០-២០១១ និងទិសដៅផែនការឆ្នាំ២០១១-២០១២ ថា វិស័យកសិកម្មឆ្នាំ២០១០ បានជួបប្រទះនូវគ្រោះធម្មជាតិរាំងស្ងួត និងទឹកជំនន់ ប៉ុន្តែស្ថានភាពផលិតកម្ម កសិកម្មជារួមស្ថិតក្នុងចំណាត់ថ្នាក់ល្អទូទាំងប្រទេស។

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ច័ន្ទ សារុន មានប្រសាសន៍ថា ឆ្នាំ២០១០ ដំណាំស្រូវប្រាំង និងស្រូវវស្សា បានដាំលើផ្ទៃដីជាង ២.៩៩៥.០០០ហិកតារ។ បរិមាណផលស្រូវសរុបប្រមាណ ៨,២៥លានតោន ដែលគណនាទិន្នផលមធ្យមក្នុង១ហិកតារជិត ៣តោន។ លោកបានឲ្យដឹងថា នៅឆ្នាំ២០១៥ ក្រសួងកសិកម្មគ្រោងនាំអង្ករចេញជាផ្លូវការឲ្យបានជាង ១លានតោន។

លោក ច័ន្ទ សារុន បន្ថែមថា ការនាំអង្ករចេញគឺម៉ាស៊ីនកិនស្រូវត្រូវតែផលិតស្រូវឲ្យទៅជា អង្ករប្រកបដោយស្តង់ដារអន្តរជាតិជាកត្តាសំខាន់ ៖ «ម៉ាស៊ីន សព្វថ្ងៃនេះ ខ្ញុំឃើញថា រោងចក្រទាំងអស់ដែលកំពុងតែត្រឹមត្រូវតាមគុណភាព ដែលតាមគេកំណត់នោះកំពុងតែប្រឹងប្រែង ២៤ម៉ោងលើ ២៤ម៉ោង គឺធ្វើ៣វេន ប៉ុន្តែមិនគ្រប់ទេ។ ខ្ញុំសង្ឃឹមថា ជាពិសេសការចូលរួមរបស់ឯកជននឹងប្រឹងប្រែងធ្វើរោងចក្រជាច្រើនទៀត នៅតាមបណ្ដាខេត្តដែលមិនទាន់បានហើយ កំពុងតែធ្វើហើយ»។

ប្រធានអង្គការសេដាក លោកបណ្ឌិត យ៉ង សាំងកុមារ មានប្រសាសន៍ថា ការពិត ឆ្នាំ២០១០ ទិន្នផលស្រូវកើនឡើងមែន។ ប៉ុន្តែការប្រមូលផលទុកដាក់ស្រូវនៅខេត្តដែលមានផ្ទៃដីដាំស្រូវ ធំជាងគេ បែរជាបណ្ដោយឲ្យស្រូវកិនទៅជាអង្ករមានការបាក់កំណាត់អង្ករមាន កម្រិតខ្ពស់បំផុត ជាហេតុនាំឲ្យមានការបារម្ភដល់ឥទ្ធិពលនៃការនាំអង្ករចេញដែរ។

លោកបណ្ឌិត យ៉ង សាំងកុមារ បន្ថែមថា ៖ «ជាពិសេសនៅខេត្តបាត់ដំបង ខេត្តបន្ទាយមានជ័យ អ៊ីចឹងគួបផ្សំនឹងពោធិ៍សាត់ខ្លះៗហ្នឹង ផលស្រូវបានច្រើនមែន ប៉ុន្តែអត្រាបាក់របស់ស្រូវពេលយកមកកិនទៅវាមានភាពខ្ពស់ អាហ្នឹងវាជាការបារម្ភមួយដែលអាចប៉ះពាល់ដល់ភាពចំណេញនៃការរក ស៊ីអង្ករ និងការនាំអង្ករចេញដែរ»។

លោករដ្ឋមន្ត្រីក្រសួងកសិកម្ម មានប្រសាសន៍បន្តថា រដូវវស្សាឆ្នាំ២០១១ មិនទាន់បានចាប់ផ្ដើមទេ ប៉ុន្តែក្រសួងកសិកម្មបានចាប់ផ្ដើមឲ្យកសិករដាំស្រូវបង្កើនរដូវជា ពូជស្រូវស្រាលមិនប្រកាន់រដូវ បានន័យថា អាចដាំស្រូវនោះក្នុងរដូវណាក៏បាន មានចំនួន ៣ប្រភេទពូជ ៖ «គឺពូជស្រូវស្រាល មិនប្រកាន់រដូវ មានពូជសែនពិដោរ ពូជអ៊ីអ៊ែរ៦៦ និងពូជជលសារ»។

លោក ច័ន្ទ សារុន មានប្រសាសន៍បន្ថែមថា កាលពីប្រារព្ធពិធីច្រត់ព្រះនង្គ័ល ឆ្នាំ២០១០ គោឧសភរាជមិនបានបរិភោគស្រូវទេ បរិភោគតែពោត និងសណ្ដែក ដែលនាំឲ្យកសិករមួយចំនួនធំបារម្ភពីផលស្រូវ ប៉ុន្តែផ្ទុយទៅវិញស្រូវឆ្នាំ២០១០ ទទួលផលបានច្រើនលើសពីឆ្នាំ២០០៩។

លោកថា ដំណាំកសិកម្មដែលកំពុងមានតម្លៃខ្ពស់ក្នុងទីផ្សារមានស្រូវ ពោត សណ្តែក កៅស៊ូ។ ចំណែកដំណាំអំពៅ បានដាំលើផ្ទៃដីជិត ៣ម៉ឺនហិកតារ និងមានរោងចក្រផលិតស្ករសមួយនៅខេត្តកោះកុង មិនទាន់អាចផលិតជាស្ករសបាននៅឡើយ ទើបតែអាចផលិតបានជាស្ករក្រហម ដោយសារផលអំពៅដាំបានតិចពេក។ ចំពោះដំណាំកៅស៊ូឆ្នាំ២០១០ ដាំលើផ្ទៃដី ១៨១.០០០ហិកតារ លើសឆ្នាំ២០០៩ ចំនួន ៣៩%។

លិតកម្មសត្វពាហនៈ និងបក្សី មានការវិវឌ្ឍន៍រីកចម្រើន។ ប៉ុន្តែមិនទាន់ធានាផ្គត់ផ្គង់សេចក្ដីត្រូវការក្នុងស្រុកបាន ដែលនាំឲ្យមានការនាំចូលសត្វជ្រូកពីបរទេសជាបណ្ដោះអាសន្ន។ ការចិញ្ចឹមបក្សីគិតពីឆ្នា២០០៥ដល់២០១០ កើនពី១៥លានក្បាល ដល់២០លាន៨សែនក្បាល។

ចំពោះវិស័យព្រៃឈើ និងជលផល លោកមានប្រសាសន៍ថា បទល្មើសស្ថិតនៅជាបញ្ហាប្រឈមដែលមិនទាន់អាចលុបបំបាត់បានទាំង ស្រុងនៅឡើយ។ បទល្មើសនោះមានការផ្លាស់ប្ដូររូបភាពពីមួយថ្ងៃទៅមួយថ្ងៃ ប្រសិនបើមិនចាប់អារម្មណ៍យកចិត្តទុកដាក់ទេនោះ៕

Milan Tomic

Hi. I’m Designer of Blog Magic. I’m CEO/Founder of ThemeXpose. I’m Creative Art Director, Web Designer, UI/UX Designer, Interaction Designer, Industrial Designer, Web Developer, Business Enthusiast, StartUp Enthusiast, Speaker, Writer and Photographer. Inspired to make things looks better.