ដោយ៖ នួន បូរិន | ថ្ងៃចន្ទ ទី30 មិថុនា 2014, 01:57 PM
ស្តាប់សំឡេង៖ |
ចម្លងទុក |
រដ្ឋមន្ត្រីការបរទេស ជប៉ុន ដែលកំពុងធ្វើទស្សនកិច្ចនៅកម្ពុជា បានសន្យាជួយបញ្ចប់វិបត្តិនយោបាយនៅកម្ពុជាដែលអូសបន្លាយជាង១១ខែ មកនេះ និងជួយធ្វើកំណែទម្រង់ប្រព័ន្ធបោះឆ្នោតឲ្យគ្រប់ភាគីអាចជឿ ទុកចិត្តបាន។
ថ្លែងនៅក្នុងសន្និសីទសារព័ត៌មាន រួមគ្នាជាមួយសមភាគីកម្ពុជា លោក ហោ ណាំហុង នៅទីស្ដីការក្រសួងការបរទេសកម្ពុជានៅព្រឹកថ្ងៃទី៣០ខែមិថុនា លោកហ្វីមីអូគីស៊ីដា រដ្ឋមន្ត្រីការបរទេសជប៉ុន បានប្រាប់អ្នកសារព័ត៌មានតាមរយៈអ្នកបកប្រែថា បន្ទាប់ពីតាមដានបីស្ថានភាពនយោបាយនៅកម្ពុជា យ៉ាងយកចិត្តទុកដាក់នោះ គឺជប៉ុនមានកាតព្វកិច្ចជួយក្នុងនាមជាសហគមន៍អន្តរជាតិ ដើម្បីបញ្ចប់វិបត្តិនេះ។
ជាមួយគ្នានេះដែរ លោករដ្ឋមន្ត្រីការបរទេសជប៉ុន ក៏សន្យាជួយធ្វើកំណែងទម្រង់ប្រព័ន្ធបោះឆ្នោតនៅកម្ពុជាផងដែរ។
រដ្ឋមន្ត្រីការបរទេសកម្ពុជា លោក ហោ ណាំហុង មានប្រសាសន៍ថា ជប៉ុនគឺជាប្រទេសលំដាប់ទី១ដែលតែងតែជួយកម្ពុជានាពេលកន្លងមក ហើយទំនាក់ទំនងប្រទេសទាំងពីរបានក្លាយទៅជាដៃគូយុទ្ធសាស្ត្រជាមួយគ្នា ។ លោកបានបញ្ជាក់ពីកម្រោងក្នុងការបង្កើតក្រុមឧត្ដមមន្ត្រី ដើម្បីពីគ្រោះយោបល់ពីបញ្ហានយោបាយ និងយោធារវាងប្រទេសទាំងពីរ។
អនុប្រធានគណបក្សសង្គ្រោះជាតិ លោក កឹម សុខា ប្រាប់VODថា លោកស្វាគមន៍វត្តមានរបស់ជប៉ុនក្នុងការដោះស្រាយវិបត្តិនយោបាយនៅ កម្ពុជា។ ប៉ុន្តែយ៉ាងណា លោកស្នើឲ្យជប៉ុនធ្វើការដោះស្រាយដោយប្រកាន់ជំហរអព្យាក្រិត និងត្រូវពិគ្រោះយោបល់ពីភាគីទាំងពីរនៅកម្ពុជា ដើម្បីឲ្យការដោះស្រាយនេះប្រកបដោយជោគជ័យ «ខ្ញុំស្វាគមន៍នូវទស្សនៈចេតនា របស់រដ្ឋាភិបាលជប៉ុន ដែលចង់ជួយដោះស្រាយបញ្ហា ជាប់គាំង ហើយកន្លងមកគាត់ក៏បានសន្យាថា នឹងជួយកែទម្រង់ការបោះឆ្នោត យើងស្វាគមន៍ក្នុងនាមគណបក្សសង្គ្រោះជាតិ។ ជោគជ័យមិនជោគជ័យ អាស្រ័យលើអ្នកដែលជួយហ្នឹង។ បើអ្នកជួយគាត់ឈរនៅកណ្តាល គាត់ពិគ្រោះទាំងសងខាង យកចំនុចសម្របសម្រួលកណ្តាលមួយ ខ្ញុំជឿថា នឹងជោគជ័យ តែប្រសិនណាយើងស្តាប់តែមួយចំហៀង នោះអត់ជោគជ័យទេ បើស្តាប់ទាំងសងខាង រកផលប្រយោជន៍ឲ្យទាំងសងខាង ប្រយោជន៍ជាតិ នោះខ្ញុំជឿថាជោគជ័យ»។
អ្នកវិភាគឯករាជ្យ លោកបណ្ឌិត ឡៅ ម៉ុងហៃ យល់ថាជប៉ុនមិនអាចបញ្ចប់វិបត្តិនយោបាយនៅកម្ពុជាបានទេ ព្រោះគណបក្សសង្គ្រោះជាតិ និងគណបក្សប្រជាជនកម្ពុជា ចង់ដោះស្រាយបញ្ហា តែប្រកាន់ជំហររឹងខ្លាចខូចប្រយោជន៍ «រឿងជួយដំណោះស្រាយជាប់គាំង នយោបាយហ្នឹង គឺយើងស្វាគមន៍ ឥឡូវនេះ គឺជាប់គាំង ហើយតាមមើលទៅទាំងសងខាងត្រូវការដោះស្រាយឲ្យឆាប់ៗដែរ។ ក៏ប៉ុន្តែមុខមាត់រៀងខ្លួន មិនជឿខ្មែរខ្លួនឯង អត់ហ៊ានឈោងដៃចាប់ដៃខ្មែរគ្នាឯង នោះត្រូវទាមទារអ្នកទីបី»។
កាលពីថ្មីៗនេះ ជប៉ុនកម្ពុជា បានបញ្ជូនអ្នកជំនាញខាងកិច្ចការបោះឆ្នោត មកកាន់កម្ពុជាដែរ ដើម្បីជួយរៀបចំកែទម្រង់ការបោះឆ្នោតនៅកម្ពុជា ហើយប្រតិភូជប៉ុន ពេលនោះ ក៏បានជួបក្រុមមន្ត្រីជាន់ខ្ពស់ខាងកិច្ចការបោះឆ្នោតនៃគណបក្ស ប្រជាជនកម្ពុជា និងគណបក្សសង្គ្រោះជាតិ ប៉ុន្តែមកដល់ពេលនេះ មិនទាន់មានលទ្ធផលអ្វីពីការប្ដេជ្ញាចូលរួមរបស់អ្នកជំនាញជប៉ុននៅ ឡើយទេ៕
0 យោបល់:
Post a Comment