ការមិនទុកចិត្តគ្នាគឺជាឧបសគ្គមួយទៀតសម្រាប់កិច្ចចរចា

(អត្ថបទចុះផ្សាយនៅថ្ងៃ

12-06-2014,

8:39 pm) | ដោយ ប៉ែន បូណា

កាលពីមុននេះ សំណើសុំដាក់ គ.ជ.ប ឲ្យទៅជាស្ថាប័នធម្មនុញ្ញនិងសុំអាជ្ញាប័ណ្ណទូរទស្សន៍គឺជារបៀបវារៈដ៏ក្តៅគគុករបស់គណបក្សសង្គ្រោះជាតិ ប៉ុន្តែ ក្រោយពីគណបក្សប្រជាជនបានយល់ព្រមសំណើទាំងពីរ បក្សប្រឆាំងហាក់ស្រងាកចិត្តទៅវិញ។ អ្វីដែលគណបក្សសង្គ្រោះជាតិបារម្ភគឺការមិនទុកចិត្តគណបក្សប្រជាជនខ្លាចក្រែងចាញ់បោកបក្សកាន់អំណាចក្រោយពេលចូលទៅអង្គុយក្នុងរដ្ឋសភា។ ការមិនទុកចិត្តគឺជាឧបសគ្គធំមួយទៀតសម្រាប់កិច្ចចរចា។

ការឆ្លើយតបជាវិជ្ជមានរបស់គណបក្សប្រជាជនកម្ពុជាដែលយល់ព្រមតាមសំណើធំៗរបស់បក្សប្រឆាំងគួរតែជាដំណឹងល្អនិងទទួលបានការសាទរពីគណបក្សនេះ។ ប៉ុន្តែ ស្តាប់ទៅវាហាក់ដូចជាមិនមែនដូច្នោះទេ។ មន្ត្រីគណបក្សសង្គ្រោះជាតិហាក់ដូចជាបង្ហាញការស្រងាកចិត្តនិងភាពសោះអង្គើយចំពោះបញ្ហានេះទៅវិញ។

បញ្ហាមិនពិបាកយល់ទេពីព្រោះជាថ្នូរនឹងការយល់ព្រមរបស់គណបក្សប្រជាជនកម្ពុជា គណបក្សសង្គ្រោះជាតិត្រូវវិលចូលក្នុងរដ្ឋសភា។ នេះហើយជាចំណុចរសើបបំផុតសម្រាប់គណបក្សសង្គ្រោះជាត។ តាមពិត ការវិលចូលរដ្ឋសភាមិនមែនជាដំណឹងអាក្រក់សម្រាប់គណបក្សសង្គ្រោះជាតិឯណាពីព្រោះតំណាងរាស្ត្រជាប់ឆ្នោតត្រូវចូលអង្គុយនៅក្នុងរដ្ឋសភាជារឿងធម្មតា។ ប៉ុន្តែ សម្រាប់គណបក្សដែលដឹកនាំដោយលោកសម រង្ស៊ី និងលោក កឹម សុខា ពេលនេះ ការវិលចូលសភាគឺជាអ្វីដែលគួរឲ្យខ្លាចរអាទៅវិញ។

នៅពីក្រោយការព្រួយបារម្ភនេះពិតជាមានហេតុផលរបស់វា៖ ហេតុផលទី១គឺ មកពីគណបក្សសង្គ្រោះជាតិខ្លាចការស្តីបន្ទោសរបស់ក្រុមអ្នកគាំទ្ររបស់ខ្លួន។ ហេតុផលទី២គឺ មកពីបក្សប្រឆាំងបារម្ភខ្លាចក្រែងចាញ់បោកគណបក្សប្រជាជនកម្ពុជា និងហេតុផលទី៣គឺ មកពីគណបក្សនេះបារម្ភខ្លាចក្រែងមានវាសនាដូចគណបក្សហ្វ៊ុនស៊ិនប៉ិចក្រោយពីចូលអង្គុយក្នុងសភាជាមួយបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន។ ហេតុផលទាំងបីយ៉ាងកំពុងធ្វើឲ្យមេដឹកនាំបក្សសង្គ្រោះជាតិសម្រាន្តមិនសូវលក់ បក់ក៏មិនសូវល្ហើយ។

ជាការពិតណាស់ គណបក្សសង្គ្រោះជាតិដែលកើនប្រជាប្រិយភាពយ៉ាងខ្លាំងក្នុងការបោះឆ្នោតសភាកាលពីខែកក្កដាឆ្នាំ ២០១៣ ជាព្រឹត្តិការណ៍គួរឲ្យកត់សម្គាល់មួយសម្រាប់ប្រវត្តិសាស្ត្រគណបក្សប្រឆាំងក្នុងរយៈពេលជិតពីរទសវត្សរ៍ចុងក្រោយនេះ។ ដើម្បីរក្សាប្រជាប្រិយភាព គណបក្សសង្គ្រោះជាតិបានដាក់ខ្លួនឲ្យស្ថិតនៅក្រោមសម្ពាធយ៉ាងខ្លាំងពីអ្នកគាំទ្ររបស់ខ្លួន។ក្រោមហេតុផល«គោរពឆន្ទៈ»ប្រជាពលរដ្ឋម្ចាស់ឆ្នោត គណបក្សនេះតែងយកចិត្តទុកដាក់ខ្លាំងណាស់ចំពោះប្រតិកម្មឬមតិយោបល់របស់អ្នកគាំទ្រជាពិសេសមតិយោបល់តាមបណ្តាញសង្គមតែម្តង។

រាល់ពេលដែលមានការសម្រេចឬក៏ការចរចាជាមួយគណបក្សប្រជាជនកម្ពុជាម្តងៗ អ្នកគាំទ្របក្សប្រឆាំងតែងបញ្ចេញមតិយោបល់ប្រាប់ដល់មេដឹកនាំគណបក្សរបស់ខ្លួន។ មតិយោបល់ទាំងនោះ ភាគច្រើនមិនចង់ឲ្យសង្គ្រោះជាតិចូលក្នុងរដ្ឋសភាទេ។ និយាយតាមបែបផ្សេង មេដឹកនាំនិងអ្នកគាំទ្រគណបក្សសង្គ្រោះជាតិអាចស្ថិតក្នុងស្ថានភាព«ឆ្មាដែលធ្លាប់រលាកទឹកក្តៅដែលសូម្បីតែឃើញទឹកត្រជាក់ក៏ខ្លាចដែរ»។ ម្យ៉ាងខ្លាចការរិះគន់ថាចូលសភាដើម្បីតែមុខមាត់និងតំណែង និងម្យ៉ាងទៀត ខ្លាចចូលកៀកគណបក្សប្រជាជននាំឲ្យបាត់បង់ប្រជាប្រិយភាព។

អ៊ីចឹងហើយបានជាក្រោយពីសំណើធំៗរបស់ខ្លួនទទួលការយល់ព្រមពីគណបក្សប្រជាជនកម្ពុជា បក្សប្រឆាំងបែរជាស្រងាកចិត្តទៅវិញ។ តាមរយៈនេះគេអាចយល់បានថា ការមិនទុកចិត្តច្បាស់ជានឹងជំរុញឲ្យគណបក្សសង្គ្រោះជាតិបន្ថែមលក្ខខណ្ឌជាច្រើនទៀតដល់ដៃគូចរចា។ លក្ខខណ្ឌបន្ថែមទាំងនោះអាចផ្តល់ផលល្អផងនិងអាក្រក់ផង។ ផលល្អនៅត្រង់ថា គណបក្សទាំងពីរនឹងមានភាពជាក់លាក់សម្រាប់ធ្វើការជាមួយគ្នាទៅថ្ងៃក្រោយ។ ប៉ុន្តែ ផលអាក្រក់វិញវានឹងធ្វើឲ្យការចរចាអូសបន្លាយទៅមុខទៀតដែលពិបាកនឹងរកទីបញ្ចប់ពីព្រោះដើម្បីឈានដល់ភាពជាក់លាក់វាទាមទារឲ្យគណបក្សទាំងពីរពិភាក្សាគ្នាអំពីចំណុចលម្អិតជាច្រើនដែលត្រូវការពេលវេលាយូរ។

ដូច្នេះ សម្បទានរបស់គណបក្សប្រជាជនកម្ពុជាពេលនេះអាចថាជាសម្ពាធទៅលើគណបក្សប្រឆាំងទៅវិញក៏ថាបាន។ សម្ពាធនៅត្រង់ថា ជាមួយនឹងសម្បទានធំៗរបស់បក្សកាន់អំណាច បែបនេះ ប្រសិនបើបក្សប្រឆាំងមិនព្រមចូលសភាទេវាអាចធ្វើឲ្យសាធារណមតិជាតិនិងអន្តរជាតិយល់ថាជាកំហុសរបស់សង្គ្រោះជាតិទៅវិញ។ ប៉ុន្តែ ប្រសិនបើប្រថុយចូលសភាដោយគ្មានភាពច្បាស់លាស់ គណបក្សសង្គ្រោះជាតិអាចប្រឈមនឹងការបាត់បង់ប្រជាប្រិយភាព។ តើនេះមិនមែនជាសម្ពាធទេឬ?

សរុបមកវិញ ការមិនទុកចិត្តគ្នាក្នុងចំណោមអ្នកនយោបាយខ្មែរមានទំហំធំធេងណាស់បើទោះជាពេលខ្លះពួកគេហាក់បង្ហាញចេតនាចង់ចរចាដើម្បីដោះស្រាយបញ្ហានយោបាយជាមួយគ្នាក៏ដោយ។ ការមិនទុកចិត្តគ្នានេះមិនត្រឹមតែជាឧបសគ្គសម្រាប់ដំណើរការចរចាដោះស្រាយវិបត្តិនយោបាយតែប៉ុណ្ណោះទេ ប៉ុន្តែ វាក៏ជាឧបសគ្គធំធេងសម្រាប់ភាពសុខសាន្តរបស់ប្រទេសជាតិផងដែរពីព្រោះបើអ្នកនយោបាយមិនទុកចិត្តគ្នា ពួកគេច្បាស់ជាបន្តនយោបាយ«លាក់កាំបិតស្នៀតពីក្រោយខ្នង» ជាបន្តទៀតដោយគ្មានទីបញ្ចប់ឡើយ៕

រក្សាសិទ្ធិដោយ thmeythmey.com

Milan Tomic

Hi. I’m Designer of Blog Magic. I’m CEO/Founder of ThemeXpose. I’m Creative Art Director, Web Designer, UI/UX Designer, Interaction Designer, Industrial Designer, Web Developer, Business Enthusiast, StartUp Enthusiast, Speaker, Writer and Photographer. Inspired to make things looks better.