នាយករដ្ឋមន្ត្រីបដិសេធការជួយពលករថាមិនមែនកេងចំណេញនយោបាយ

ដោយ៖ អ៊ឹង ប៊ុនថន | ថ្ងៃព្រហស្បតិ៍ ទី26 មិថុនា 2014, 11:15 AM,

ស្តាប់សំឡេង៖

លោកនាយករដ្ឋមន្ត្រី ហ៊ុន សែន (រូបថត៖ តាត ឧត្តម)

លោកនាយក រដ្ឋមន្ត្រី ហ៊ុន សែន នៅថ្ងៃព្រហ្បតិ៍នេះ បានច្រានចោល ការចោទប្រកាន់ដែលថា រដ្ឋាភិបាល យកករណីជួយពលករដែលមកពីថៃនោះ ជាការកេងចំណេញនយោបាយផ្តាច់មុខរបស់គណបក្សកាន់អំណាច។

ការបដិសេធនេះ ធ្វើឡើងក្នុងទិវាអន្តរជាតិប្រយុទ្ធប្រឆាំងនឹងគ្រឿងញៀន ដែលធ្វើឡើងនៅកោះពេជ្រ «ខ្ញុំសូមសម្តែងនូវការអរគុណនូវការអរគុណ និងកោតសរសើរ ចំពោះការខិតខំទាំងអស់នេះ បង្ហាញឲ្យឃើញពីការទទួលខុសត្រូវរបស់យើង ហើយយើងមិនបានគិតថា អ្នកណាបោះឆ្នោតឲ្យគណបក្សណាទេ យើងមិនបានគេងចំនេញពីនយោបាយណាមួយ នៅលើបញ្ហានេះ។ ជនរួមជាតិរបស់យើង ទោះបីមាននិន្នាការបែបណា តែយើងបានដោះស្រាយមកដល់កន្លែងនេះ»។

ប្រតិកម្មនេះ កើតឡើងបន្ទាប់ពីអ្នកវិភាគយល់ថា រឿងពលករខ្មែរ បានក្លាយជាគោលដៅសំខាន់មួយរបស់អ្នកនយោបាយកាន់អំណាច ដើម្បីទាញប្រជាប្រិយភាពផ្តាច់មុខ ខណៈមន្ត្រីជាន់ខ្ពស់គណបក្សប្រជាជនកម្ពុជា លោក កែ កឹមយ៉ាន បានអំពាវនាវពលករទាំងនោះបដិសេធចំពោះវត្តមានរបស់ក្រុមមួយ ដែលលោកអះអាងថា មកបង្អាប់រដ្ឋាភិបាល និងបង្កជម្លោះក្នុងពេលដែលពលករកំពុងភិតភ័យ។

ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យ៉ង គឹមអេង ធ្លាប់បញ្ជាក់ថា ការជួយសង្គ្រោះគ្នាក្នុងគ្រាអាសន្នជារឿងសំខាន់ ដោយមិនត្រូវប្រកាន់បក្សពួក និងទាញយកប្រជាប្រិយភាពផ្តាច់មុខនោះទេ «គណបក្សប្រជាជនតែងតែលើកឡើងថា កាលណាមានបញ្ហា មានតែមុខគណបក្សប្រជាជន ចុះបើគណបក្សផ្សេងគេទៅជួយចែក គេទៅជួយឈឺឆ្អាលហើយគេជួយក្នុងការងរហ្នឹងរួមគ្នាហើយ រឿងអីដែលអាជ្ញាធរ ឬគណបក្សប្រជាជន ដែលត្រូវហាមឃាត់ ឬក៏មិនសប្បាយចិត្ត គួរតែសប្បាយចិត្ត។ ហើយប្រសិនយើងធ្វើអ៊ីចឹងទាល់តែយើងចាត់ទុកប្រទេសហ្នឹង ជារបស់ក្រុមយើងតែមួយ មិនមែនជាប្រទេសរបស់យើងទាំងអស់គ្នា»។

យ៉ាងនេះក្តី លោកនាយករដ្ឋមន្ត្រី ហ៊ុន សែន បានទទួលស្គាល់ចំពោះការរិះគន់ ដែលថា រដ្ឋាភិបាលរបស់លោកបរាជ័យក្នុងការដោះស្រាយបញ្ហាការងារ ប៉ុន្តែលោកឆ្លើយតបវិញថា ការបញ្ជូនពលករទៅក្រៅប្រទេសនេះ មិនមែនកម្ពុជាជាអ្នកបញ្ជូនទៅច្រើនជាងគេនោះទេ «ខ្ញុំសូមបញ្ជក់បញ្ហានេះ មិនមែនឆ្លើយតបរបៀបអាយ៉ៃឆ្លងឆ្លើយទេ នៅក្នុងបណ្តាប្រទេសអាស៊ាន ប្រទេសហ្វីលីពីន គឺជាប្រទេសដែលធំជាងគេនាំចេញពលករ។ ទីផ្សារហុងកុង ពលករនៅហុងកុង ថែទាំផ្ទះសម្បែង មេដោះជាដើមសឹងតែហ្វីលីពីនប៉ាវផ្តាច់។ នៅម៉ាឡេស៊ី នៅសឹង្ហបូរី គឺពលករហ្វីលីពីនច្រើនមិនមែនរាប់ម៉ឺននាក់ដូចកម្ពុជាទេ គឺរាប់លាននាក់»។

លោក កឹម សុខា អនុប្រធានគណបក្សសង្គ្រោះជាតិ មានប្រសាសន៍ថា ការឆ្លើយតបរបស់នាយករដ្ឋមន្ត្រី គ្រាន់តែជាការបកស្រាយយករួចខ្លួន «រឿងបញ្ហារដ្ឋាភិបាលសព្វថ្ងៃនេះ គឺគ្មានការទទួលខុសត្រូវ ចំពោះប្រជាពលរដ្ឋក្នុងការបង្កើតការងារជូនប្រជាពលរដ្ឋ ឲ្យបានត្រឹមត្រូវ ទោះការងារក្នុងស្រុកក៏ដោយ ក្រៅស្រុកក៏ដោយ គឺក្នុងស្រុកអត់ខំពង្រីកបង្កើតការងារជូនប្រជាពលរដ្ឋទេ ហើយទៅក្រៅស្រុកក៏ទុកឲ្យពួកគាត់ទៅដោយមិនមានការរៀបចំឲ្យបានច្បាប់លាស់ បានជារឿងហេតុកើតឡើង»។

នៅពេលដែលរដ្ឋាភិបាលយោធថៃ សម្រុកដឹកពលករខ្មែរ មកទម្លាក់ចោលនៅតាមព្រំដែន ឃើញមានសកម្មភាពផ្តល់ជំនួយមនុស្សធម៌ជាច្រើន ពីប្រជាពលរដ្ឋទូទៅ អង្គការសង្គមស៊ីវិល រដ្ឋាភិបាល និងគណបក្សនៅក្រៅរដ្ឋាភិបាល។ ប៉ុន្តែគណបក្សសង្គ្រោះជាតិ អះអាងថា គណបក្សប្រជាជនកម្ពុជា បានរារាំងសកម្មភាពលោក កឹម សុខា និងតំណាងរាស្ត្រជាប់ឆ្នោតមួយចំនួនទៀត ដែលចុះទៅផ្តល់ជំនួយមនុស្សធម៌ដល់ប្រជាពលករទាំងនោះ៕

Milan Tomic

Hi. I’m Designer of Blog Magic. I’m CEO/Founder of ThemeXpose. I’m Creative Art Director, Web Designer, UI/UX Designer, Interaction Designer, Industrial Designer, Web Developer, Business Enthusiast, StartUp Enthusiast, Speaker, Writer and Photographer. Inspired to make things looks better.