លោក វន់ ពៅ ចាប់ផ្តើមកាន់ក្បាលមេក្រូឡើងវិញនៅទីសាធារណៈបន្ទាប់ពីអវត្តមានជិត៦ខែ

លោក វន់ ពៅ ប្រធានសមាគមឯករាជ្យសេដ្ឋកិច្ចក្រៅប្រព័ន្ធកម្ពុជា នៅក្នុងការតវ៉ានាពេលកន្លងមក

រូបភាពឯកសារ

ដោយ ញឹម សុផល

លោក វន់ ពៅ ប្រធានសមាគមឯករាជ្យសេដ្ឋកិច្ចក្រៅប្រព័ន្ធកម្ពុជា បានចាប់ផ្តើមបង្ហាញមុខជាលើកដំបូងនៅមុខក្រសួងការងារនៅថ្ងៃចន្ទនេះ ក្នុងការដឹកនាំតវ៉ាមួយជួយដល់ពលករដែលបំរើការងារតាមផ្ទះ។ ការចាប់ផ្តើមតវ៉ាជាលើកដំបូងរបស់លោក វន់ ពៅ បានធ្វើឡើងបន្ទាប់ពីលោកខកខាន មិនបានដឹកនាំការតវ៉ានានាចាប់តាំងពីដើមខែមករា ឆ្នាំ២០១៤កន្លងមក ដោយសារអាជ្ញាធរចាប់ខ្លួនដាក់ឃុំឃាំងពាក់ព័ន្ធនឹងការដឹកនាំកម្មករធ្វើកូដកម្មតម្លើងប្រាក់ខែនៅមុខរោងចក្រយាកជីង។

សេចក្តីរាយការណ៍របស់ ញឹម សុផល

ស្តាប់ (02:26)

16/06/2014

លោក វន់ ពៅ ប្រធានសមាគមឯករាជ្យសេដ្ឋកិច្ចក្រៅប្រព័ន្ធកម្ពុជា នៅព្រឹកថ្ងៃចន្ទទី១៦មិថុនានេះ បានដឹកនាំពលករដែលបំរើការងារនៅតាមផ្ទះប្រមាណជា៣០នាក់ ដាក់ញ្ញតិទៅក្រសួងការងារដើម្បីស្នើសុំឲ្យស្ថាប័នមានសមត្ថកិច្ចនេះជួយដោះស្រាយបញ្ហាមួយចំនួនទាក់ទងទៅនឹងសិទ្ធិ និងលក្ខខ័ណ្ឌការងាររបស់ពួកគេ។ វត្តមានរបស់លោក វន់ ពៅ នៅក្រសួងការងារនៅថ្ងៃនេះគឺជាលើកដំបូងហើយដែលសកម្មជនការពារសិទ្ធិកម្មកររូបនេះបានកាន់ក្បាលមេក្រូឡើងវិញ ចេញមុខដឹកនាំការតវ៉ាជួយទៅដល់ពលករ បន្ទាប់ពីអាក់ខានអស់រយៈពេលជិតកន្លះឆ្នាំ ដោយសារតែអាជ្ញាធរចាប់ដាក់ឃុំ ហើយត្រូវបានដោះលែងឲ្យមានសេរីភាពវិញកាលពីថ្ងៃទី៣០ខែឧសភាកន្លងទៅនេះ។

លោក វន់ ពៅ ដែលមានពាក់មួយស្លឹកឈរពីមុខបដាត្រដាងដោយពួកអ្នកតវ៉ា បានថ្លែងថា នៅក្នុងញត្តិដែលបានដាក់ជូនក្រសួងការងារ រួមមានបីចំណុចគឺទីមួយស្នើសុំឲ្យរដ្ឋាភិបាលកម្ពុជាផ្តល់សច្ចាប័ន ទៅលើអនុសញ្ញាលេខ១៨៩ របស់អង្គការអន្តរជាតិខាងការងារ ILO ដែលអនុសញ្ញានេះបានចែងទាក់ទងទៅនឹងសិទ្ធិគ្រប់បែបយ៉ាងរបស់ពលករបំរើការងារតាមផ្ទះ។ ទីពីរ គឺស្នើសុំឲ្យមានការធ្វើវិសោធនកម្មច្បាប់ការងារកម្ពុជា ដើម្បីឲ្យច្បាប់គ្របដណ្តប់ទៅលើពលករដែលបំរើការងារតាមផ្ទះដូចជាវិស័យកាត់ដេរ និងវិស័យនានាមួយចំនួនទៀត។

រីឯចំណុចចុងក្រោយនោះស្នើសុំឲ្យរដ្ឋាភិបាលមានយន្តការដោះស្រាយ និងទទួលពាក្យបណ្តឹង ព្រមទាំងធ្វើអធិការកិច្ចទៅលើការងារបំរើតាមផ្ទះផង ដែលការងារនេះពលករបានជួបប្រទះការរំលោភសិទ្ធជាច្រើនពីម្ចាស់ផ្ទះ។ ក្រសួងការងារមិនមានការឆ្លើយតបភ្លាមៗទេចំពោះសំណើរនេះ គឺបានត្រឹមតែទទួលញ្ញតិប៉ុណ្ណោះ ហើយគិតមកទល់ពេលនេះជាលើកទីបីហើយដែលអ្នកបំរើការងារតាមផ្ទះបានស្នើសុំអន្តរាគមន៍ពីក្រសួងការងារ។

ដោយសារមិនមានច្បាប់គ្រប់គ្រងច្បាស់លាស់គេមិនដឹងថា កម្មករដែលបំរើការងារតាមផ្ទះដែលទទួលបានប្រាក់ខែប្រមាណជា ៥ម៉ឺនទៅ១០ម៉ឺនរៀលក្នុងមួយខែនោះមានចំនួនប៉ុន្មាននោះទេ។ ទោះជាយ៉ាងនេះក្តី លោក វន់ ពៅ សន្យាថានឹងដឹកនាំតវ៉ាឲ្យពលករបំរើការងារតាមផ្ទះ ទទួលបានការយកចិត្តទុកដាក់តាមផ្លួវច្បាប់ដូចជាវិស័យផ្សេងៗដែរ។បន្ថែមពីនេះលោកនឹងមានគំរោងចេញមុខក្នុងការជួយតវ៉ាជាបន្តបន្ទាប់ទៀតនៅពេលខាងមុខ៕

Milan Tomic

Hi. I’m Designer of Blog Magic. I’m CEO/Founder of ThemeXpose. I’m Creative Art Director, Web Designer, UI/UX Designer, Interaction Designer, Industrial Designer, Web Developer, Business Enthusiast, StartUp Enthusiast, Speaker, Writer and Photographer. Inspired to make things looks better.