សំនួរ ទាក់ទងនឹងការបោះឆ្នោត

សំនួរចម្លើយទាក់ទងនឹងការបោះឆ្នោតជាតិ
ការបោះឆ្នោតជាតិនៅកម្ពុជា ប្រព្រឹត្តទៅតាមច្បាប់ស្តីពីការបោះឆ្នោតជ្រើសតាំងតំណាងរាស្ត្រ(ច.ប.ត.រ)។

តើការបោះឆ្នោតធ្វើឡើងនៅពេលណា?
ការបោះឆ្នោតជាតិធ្វើឡើងរាល់៥ឆ្នាំម្តង នៅថ្ងៃអាទិត្យ តាមកាលបរិច្ឆេទកំណត់ឡើងដោយនាយករដ្ឋមន្ត្រី។

អ្នកណាជាអ្នករៀបចំការបោះឆ្នោត?
គណៈកម្មាធិការជាតិរៀបចំការបោះឆ្នោត(គ.ជ.ប) គឺជាស្ថាប័នទទួលបន្ទុករៀបចំការបោះឆ្នោត។

គ.ជ.ប មានសាខារបស់ខ្លួនគឺគណៈកម្មការរាជធានី/ខេត្តរៀបចំការបោះឆ្នោត (កធ/ខប) គណៈកម្មការឃុំ សង្កាត់រៀបចំការបោះឆ្នោត (គឃ/សប) និង គណៈកម្មការការិយាល័យរៀបចំការបោះឆ្នោតនិង រាប់សន្លឹកឆ្នោត (គកប/គករ)។

តើនរណាខ្លះអាចបោះឆ្នោតបាន?
អ្នកបោះឆ្នោតត្រូវតែជាពលរដ្ឋកម្ពុជា មានអាយុ១៨ឆ្នាំ ឬច្រើនជាងនេះនៅថ្ងៃបោះឆ្នោត និងមានទីលំនៅក្នុងឃុំ/សង្កាត់ ទីដែលគេចង់បោះឆ្នោត។ លើសពីនេះ អ្នកបោះឆ្នោតអាចចុះឈ្មោះបោះឆ្នោតនៅការិយាល័យបោះឆ្នោតតែមួយប៉ុណ្ណោះ។ ពលរដ្ឋកម្ពុជាដែលមានទីលំនៅលើសពីមួយនៅក្នុងព្រះរាជាណាចក្រកម្ពុជា ត្រូវតែជ្រើសរើសទីលំនៅណាមួយដើម្បី ធ្វើការចុះឈ្មោះបោះឆ្នោត។ អ្នកជាប់ពន្ធធនាគារ និងជនវិកលចរិតមិនត្រូវអនុញ្ញាតិឲ្យបោះឆ្នោតទេ។

បញ្ហាប្រឈមមួយដែលអ្នកបោះឆ្នោត ដូចជាកម្មកររោងចក្រ ខ្លះបានជួបប្រទះ គឺទីលំនៅនៅក្នុងអត្តសញ្ញាណប័ណ្ណសម្គាល់របស់គេ គឺទីកន្លែងកំណើតរបស់គេ ផ្ទាល់តែម្តង ពោលគឺផ្សេងពីទីដែលគេកំពុងស្នាក់នៅ។ ការនេះមានន័យថាគេត្រូវតែធ្វើដំណើរយ៉ាងឆ្ងាយ ដំបូងដើម្បីទៅចុះឈ្មោះបោះឆ្នោត ហើយបន្ទាប់មកដើម្បីទៅបោះឆ្នោត។

តើខ្ញុំអាចបោះឆ្នោតបានទេ បើខ្ញុំកំពុងរស់នៅក្រៅប្រទេសកម្ពុជា?
បច្ចុប្បន្ន ការបោះឆ្នោតធ្វើឡើងតែនៅក្នុងប្រទេសកម្ពុជាប៉ុណ្ណោះ មានន័យថាពលរដ្ឋកម្ពុជាទាំងអស់មិនអាចបោះឆ្នោតពីបរទេសបានទេ បើទោះបីជាគេមានសិទ្ធិ បោះឆ្នោតក៏ដោយ។

តើខ្ញុំចុះឈ្មោះបោះឆ្នោតតាមរបៀបណា?
ពលរដ្ឋអាចចុះឈ្មោះបោះឆ្នោតបាន តែនៅក្នុងអំឡុងពេលដែលកំណត់ដោយគ.ជ.បប៉ុណ្ណោះ។ តាមធម្មតា ការចុះឈ្មោះបោះឆ្នោតធ្វើឡើងនៅរវាងខែតុលា និង ធ្នូដោយរយៈពេលចុះឈ្មោះពិតប្រាកដខុសគ្នាពីឆ្នាំមួយទៅឆ្នាំមួយទៀត ទៅតាមសេចក្តីសម្រេចរបស់គ.ជ.ប។

ដើម្បីអាចចុះឈ្មោះបោះឆ្នោតបាន អ្នកត្រូវទៅចុះឈ្មោះដោយផ្ទាល់នៅការិយាល័យឃុំ/សង្កាត់ក្នុងអំឡុងពេលនៃការចុះឈ្មោះបោះឆ្នោត។ អ្នកត្រូវបង្ហាញឯកសារ ដើម្បីបញ្ជាក់ថាអ្នកជាពលរដ្ឋកម្ពុជាមានអាយុ១៨ឆ្នាំឬលើសពីនេះនៅថ្ងៃបោះឆ្នោត និងមានទីលំនៅក្នុងឃុំ/សង្កាត់ដែលអ្នកមានគម្រោងទៅបោះឆ្នោត។

ប្រសិនបើខ្ញុំបានចុះឈ្មោះបោះឆ្នោតហើយ តើខ្ញុំធ្វើដូចម្តេចដើម្បីធានាថាខ្ញុំពិតជាមានឈ្មោះនៅក្នុងបញ្ជីបោះឆ្នោត?
អ្នកអាចធ្វើការផ្ទៀងផ្ទាត់ ថាតើឈ្មោះរបស់អ្នកមាននៅក្នុងបញ្ជីឈ្មោះបោះឆ្នោត តែនៅក្នុងអំឡុងពេលនៃការចុះឈ្មោះនិងពិនិត្យឈ្មោះបោះឆ្នោតដូចដែលបាន កំណត់ដោយគ.ជ.បតែប៉ុណ្ណោះ និងនៅទីកន្លែងដែលអ្នកបានទៅចុះឈ្មោះនោះ។ ប្រសិនបើអ្នករកឈ្មោះខ្លួនឯងមិនឃើញនៅក្នុងបញ្ជីបោះឆ្នោត អ្នកត្រូវប្តឹង ភ្លាមៗទៅកាន់ភ្នាក់ងារបោះឆ្នោតដែលពាក់ព័ន្ធ។ បន្ទាប់ពីអំឡុងពេលនៃការចុះឈ្មោះនិងពិនិត្យឈ្មោះបោះឆ្នោតបានកន្លងផុត គ.ជ.បជាទូទៅមិនទទួលបណ្តឹង ទាំងនោះទៀតទេ។ បច្ចុប្បន្ន អ្នកបោះឆ្នោតក៏អាចស្វែងរកឈ្មោះរបស់ខ្លួនឯងបាននៅលើគេហទំព័ររបស់ គ.ជ.ប ផងដែរ។

តើខ្ញុំត្រូវទៅបោះឆ្នោតនៅទីណា?
អ្នកអាចទៅបោះឆ្នោតបានតែនៅតាមការិយាល័យបោះឆ្នោត ដែលមានឈ្មោះរបស់អ្នកនៅក្នុងបញ្ជីឈ្មោះបោះឆ្នោតតែប៉ុណ្ណោះ។ គ.ជ.បនឹងបង្កើតការិយាល័យ បោះឆ្នោតយ៉ាងហោចណាស់មួយនៅក្នុងឃុំ/សង្កាត់និមួយៗ។ ការិយាល័យមួយ នឹងត្រូវមានអ្នកបោះឆ្នោតមិនលើសពី៧០០នាក់ទេ។ តាមច្បាប់ ឈ្មោះនិងទីតាំងនៃការិយាល័យបោះឆ្នោត និងត្រូវផ្សព្វផ្សាយជាសាធារណៈយ៉ាងហោចណាស់៣០ថ្ងៃ មុនថ្ងៃបោះឆ្នោត នៅតាមការិយាល័យបោះឆ្នោត។

តើខ្ញុំត្រូវយកអ្វីទៅតាមខ្លួននៅថ្ងៃបោះឆ្នោត?
អ្នកត្រូវតម្រូវឲ្យយកឯកសារដើម្បីបញ្ជាក់អត្តសញ្ញាណ។ ឯកសារនោះអាចជាអត្តសញ្ញាណប័ណ្ណ លិខិតឆ្លងដែន សៀវភៅគ្រួសារ សៀវភៅកំណើត អត្តសញ្ញាណប័ណ្ណទាហាន អត្តសញ្ញាណប័ណ្ណមន្ត្រីរាជការស៊ីវិល អត្តសញ្ញាណប័ណ្ណនគរបាលជាតិ សង្ឃដីកា និងលិខិតបញ្ជាក់អត្តសញ្ញាណដែលចេញដោយ អាជ្ញាធរ ឃុំ/សង្កាត់ជាដើម។

ប្រសិនបើខ្ញុំបានពិនិត្យផ្ទៀតផ្ទាត់ឈ្មោះរបស់ខ្ញុំរួចរាល់ហើយមុនថ្ងៃបោះឆ្នោត ប៉ុន្តែនៅពេលដែលខ្ញុំទៅដល់ការិយាល័យបោះឆ្នោត ពុំមានឈ្មោះរបស់ខ្ញុំនៅទីនោះ?
បើទោះបីជាច្បាប់បោះឆ្នោតពុំបានបញ្ជាក់ដោយចំៗ ថាតើអ្នកដែលបានចុះឈ្មោះបោះឆ្នោត និងបានពិនិត្យផ្ទៀងផ្ទាត់ឈ្មោះរបស់ខ្លួនរួចហើយ ត្រូវធ្វើដូចម្តេច នៅពេលដែលគេមិនអាចរកឈ្មោះរបស់ខ្លួនឯងឃើញនៅតាមការិយាល័យបោះឆ្នោតនៅថ្ងៃបោះឆ្នោតក៏ដោយ ច្បាប់នេះបានចែងថាជនណាក៏ដោយ អាចធ្វើ ពាក្យបណ្តឹងទៅកាន់ភ្នាក់ងាររៀបចំការបោះឆ្នោតដែលពាក់ព័ន្ធ និងក្រុមប្រឹក្សារដ្ឋធម្មនុញ្ញ អំពីបញ្ហាទាំងឡាយណាដែលទាក់ទងនឹងការបោះឆ្នោត។

អ្នកណាខ្លះអាចចូលរួមប្រកួតប្រជែងក្នុងការបោះឆ្នោត?
អ្នកដែលចង់ឈរឈ្មោះជាបេក្ខជនតំណាងរាស្ត្ររដ្ឋសភា ត្រូវមានសញ្ជាតិកម្ពុជាពីកំណើត មានទីលំនៅក្នុងព្រះរាជាណាចក្រកម្ពុជា មានសិទ្ធិបោះឆ្នោត និងមាន អាយុយ៉ាងតិច២៥ឆ្នាំនៅថ្ងៃបោះឆ្នោត និងត្រូវទទួលបានការតែងតាំងដោយគណបក្សនយោបាយដែលបានចុះឈ្មោះប្រកួតប្រជែងនៅក្នុងការបោះឆ្នោត។

មានអ្នកខ្លះមិនត្រូវអនុញ្ញាតិដោយច្បាប់ឲ្យឈរឈ្មោះជាបេក្ខជនទេ ដូចជាមន្ត្រីរាជការស៊ីវិល មន្ត្រីតុលាការ មន្ត្រីគ.ជ.ប កងកម្លាំងនគរបាលជាតិ មន្ត្រីកងយុទ្ធ ពលខេមរភូមិន្ទ ក្នុងមុខតំណែង និងបព្វជិត្វសាសនា។ លើសពីនេះ អ្នកដែលត្រូវបានតុលាការផ្តន្ទាទោសដាក់ពន្ធនាគារពីបទឧក្រិដ្ឋឬមជ្ឈិម ហើយដែលមិនទាន់ មាននីតិសម្បទាឡើងវិញ ក៏មិនអាចចូលរួមប្រកួតប្រជែងក្នុងការបោះឆ្នោតបានដែរ។

គណបក្សណាខ្លះដែលអាចចូលរួមប្រកួតប្រជែងនៅក្នុងការបោះឆ្នោត?
គណបក្សដែលចង់ចូលរួមប្រកួតប្រជែងនៅក្នុងការបោះឆ្នោត ត្រូវតែចុះឈ្មោះជាមួយនឹងគ.ជ.ប ក្នុងអំឡុងពេល៧០ថ្ងៃមុនការបោះឆ្នោតមកដល់។ គ.ជ.បត្រូវ ចេញសេចក្តីសម្រេចលើពាក្យសុំចុះឈ្មោះ ក្នុងអំឡុងពេល៧ថ្ងៃបន្ទាប់ពីទទួលបានពាក្យសុំនោះ។ គ.ជ.បត្រូវជម្រាបដល់គណបក្ស ក្នុងករណីពាក្យសុំនោះ មានការខ្វះចន្លោះ។ គណបក្សមានពេល៥ថ្ងៃដើម្បីបំពេញបន្ថែម សេចក្តីខ្វះចន្លោះនោះ។

ចំពោះគណបក្សដែលពាក្យសុំចុះឈ្មោះរបស់ខ្លួន ត្រូវបានបដិសេធដោយគ.ជ.ប មានសិទ្ធិប្តឹងតវ៉ាក្នុងរយៈពេល៥ថ្ងៃ បន្ទាប់ពីគ.ជ.បបានចេញសេចក្តីសម្រេច នោះ។ ក្រុមប្រឹក្សារដ្ឋធម្មនុញ្ញ ត្រូវចេញសេចក្តីសម្រេចទៅលើបណ្តឹងតវ៉ា ក្នុងអំឡុងពេល១០ថ្ងៃក្រោយទទួលបានបណ្តឹងតវ៉ា។

តើមានគោលការណ៍អ្វីខ្លះទាក់ទងនឹងការឃោសនាបោះឆ្នោត?
គោលដៅនៃការឃោសនាបោះឆ្នោត គឺផ្តល់ឧិកាសឲ្យគណបក្សនយោបាយ និងបេក្ខជនដែលចូលរួមប្រកួតប្រជែងនៅក្នុងការបោះឆ្នោត បញ្ចេញគំនិតរបស់គេ ទៅកាន់អ្នកបោះឆ្នោត ក្នុងលក្ខណៈបើកចំហ និងដោយសន្តិភាព។ គណបក្សនយោបាយឬបេក្ខជន មិនត្រូវប្រើប្រាស់ការគម្រាមកំហែង បំភិតបំភ័យ ឬ ហឹង្សា ប្រឆាំងនឹងពលរដ្ឋ គណបក្សនយោបាយ ឬ បេក្ខជនដទៃទៀត ឬញុះញង់អ្នកគាំទ្រខ្លួនឲ្យធ្វើរបៀបនេះជំនួសខ្លួនទេ។ ការពិន័យសម្រាប់សកម្មភាពខុសច្បាប់ទាំង នេះរួមមានការហាមឃាត់មិនឲ្យចូលរួមបោះឆ្នោត និងប្រកួតប្រជែងនៅក្នុងការបោះឆ្នោត ក៏ដូចជាការផាកពិន័យជាប្រាក់ក្នុងចន្លោះពី៥លានទៅ២៥លានរៀល។

គណបក្សនយោបាយនិងបេក្ខជន អាចជួលរោងកុនរដ្ឋឬឯកជន កីឡាដ្ឋាន សួនសាធារណៈ និងសាលប្រជុំនានា ដរាបណាគេបានដាក់ពាក្យសុំប្រើប្រាស់ទីតាំង ទាំងនេះយ៉ាងតិច៣ថ្ងៃមុនពេលព្រឹត្តិការណ៍នេះចាប់ផ្តើម។ គណបក្សនិងបេក្ខជនត្រូវបញ្ជូនច្បាប់ចម្លងពាក្សសុំមួយច្បាប់ទៅកាន់គណៈកម្មការបោះឆ្នោតឃុំ/សង្កាត់ ។ ម្ចាស់ទីកន្លែងត្រូវឆ្លើយតបទៅកាន់អ្នកដាក់ពាក្យសុំ ក្នុងអំឡុងពេល២៤ម៉ោងបន្ទាប់ពីទទួលបានពាក្យសុំនោះ។ ការប្រើប្រាស់អាគារដ្ឋ និងយានយន្តក្នុង គោល ដៅឃោសនាបោះឆ្នោតត្រូវហាមឃាត់ដោយច្បាប់។

ការឃោសនាបោះឆ្នោតមានរយៈពេល៣០ថ្ងៃ ហើយគ្រប់សកម្មភាពឃោសនា ត្រូវបញ្ចប់២៤ម៉ោង មុនថ្ងៃបោះឆ្នោត។

តើមានគោលការណ៍អ្វីខ្លះទាក់ទងនឹងការទទួលបានពត៌មានបោះឆ្នោត?
គ្រប់ប្រព័ន្ធផ្សព្វផ្សាយទាំងអស់ ដោយរួមទាំងប្រព័ន្ធផ្សព្វផ្សាយរបស់រដ្ឋ ទូរទស្សន៍ និងវិទ្យុ ត្រូវផ្សព្វផ្សាយពត៌មានតាមការសំណើរបស់គ.ជ.ប ដោយឥតគិតថ្លៃ ដើម្បីផ្សព្វផ្សាយសកម្មភាពទាក់ទងនឹងការបោះឆ្នោត និងដើម្បីអប់រំអ្នកបោះឆ្នោត។

តាមច្បាប់ គ.ជ.បត្រូវផ្សព្វផ្សាយសារនយោបាយរបស់គណបក្សចូលរួមប្រកួតប្រជែងដោយផ្អែកលើគោលការណ៍”អ្នកមកមុន នឹងត្រូវទទួលបានការផ្សព្វផ្សាយ មុនគេ”។

តើក្រុមណាខ្លះធ្វើការទាក់ទងនឹងការតាមដាន និងសង្កេតការណ៍បោះឆ្នោត?
ក្រុមតាមដាន និងសង្កេតការណ៍បោះឆ្នោតគឺជាក្រុមមិនប្រកាន់បក្សនយោបាយ ដែលធ្វើការសង្កេតវិភាគ និងរាយការណ៍អំពីសកម្មភាពទាក់ទងនឹងការបោះឆ្នោត មុនពេល ក្នុងអំឡុងពេល និងក្រោយពេលបោះឆ្នោត។ ខាងក្រោមគឺជាឧទាហរណ៍នៃក្រុមខ្លះៗដែលធ្វើកិច្ចការដូចដែលបានរៀបរាប់ពីខាងដើម៖

គណៈកម្មាធិការដើម្បីការបោះឆ្នោតដោយសេរីនិងយុត្តិធម៌នៅកម្ពុជា (COMFREL): http://www.comfrel.org/eng/
វិទ្យាស្ថានជាតិប្រជាធិបតេយ្យ (NDI):http://www.ndi.org/cambodia
គណៈកម្មាធិការអព្យាក្រឹត និង យុត្តិធម៏សំរាប់ការបោះឆ្នោតដោយសេរី និងត្រឹមត្រូវនៅកម្ពុជា(NICFEC): http:///www.nicfec.wordpress.com/
បណ្តាញអាស៊ីដើម្បីការបោះឆ្នោតដោយសេរី (ANFREL): http://anfrel.org/category/country-profiles/cambodia/

តើអ្នកសង្កេតការណ៍បោះឆ្នោតគឺជាអ្នកណា?
បុគ្គលដែលជា”អ្នកសង្កេតការណ៍”អាចតាមដានរាល់សកម្មភាពបោះឆ្នោតមុនពេល ក្នុងអំឡុងពេល និងក្រោយពេលនៃការបោះឆ្នោត។ អ្នកសង្កេតការណ៍មាន ប្រភេទផ្សេងៗគ្នា។ អ្នកសង្កេតការណ៍នយោបាយគឺជាភ្នាក់ងារគណបក្សដែលចូលរួមប្រកួតប្រជែងនៅក្នុងការបោះឆ្នោត ហើយដើរតួនាទីជាអ្នកតំណាងឲ្យផល ប្រ យោជន៍គណបក្សនយោបាយរបស់គេរៀងៗខ្លួន។ គណបក្សនយោបាយ ដែលចូលរួមក្នុងការបោះឆ្នោត អាចបញ្ជូនអ្នកសង្កេតការណ៍ពីរនាក់ សម្រាប់ ការិយាល័យបោះឆ្នោតនិមួយៗ។

រដ្ឋាភិបាលបរទេស អង្គការក្រៅរដ្ឋាភិបាល និងអង្គការអន្តរជាតិក៏អាចបញ្ជូនអ្នកសង្កេតការណ៍ឯករាជ្យមកចូលរួមដែរ។ អ្នកសង្កេតការណ៍ឯករាជ្យ ជាអ្នកដែល មិនប្រកាន់បក្សនយោបាយ និងទទួលបន្ទុកសង្កេតការណ៍រាល់សកម្មភាពបោះឆ្នោតទាំងអស់ ដោយអព្យាក្រិត្យនិងមិនលម្អៀង។

អ្នកសង្កេតការណ៍ទាំងអស់ត្រូវតែទទូលបានការយល់ព្រមពីគ.ជ.ប ដើម្បីអាចសង្កេតការណ៍បាន ហើយត្រូវមានប័ណ្ណសង្កេតការណ៍បោះឆ្នោតដែលចេញដោយគ.ជ.ប ក្នុងអំឡុងពេលបេសកកម្មរបស់គេ។ អ្នកសង្កេតការណ៍បោះឆ្នោតអន្តរជាតិ អាចធ្វើដំណើរសង្កេតនៅទីណាក៏បានក្នុងប្រទេសកម្ពុជា ដោយមិនចាំបាច់ ត្រូវការការអនុញ្ញាតិជាមុន។ ប៉ុន្តែអ្នកសង្កេតការណ៍ជាតិ ត្រូវតែសង្កេតការណ៍នៅក្នុងខេត្ត/ក្រុងដែលគេត្រូវបានអនុញ្ញាតិរួចហើយនោះតែប៉ុណ្ណោះ។

ប្រសិនបើអ្នកចង់ក្លាយខ្លួនជាអ្នកសង្កេតការណ៍ឯករាជ្យ អ្នកអាចស្វែងរកមើលពត៌មានបន្ថែមដោយចូលទៅកាន់គេហទំព័ររបស់គ.ជ.ប ឬក៏គេហទំព័ររបស់ ខមហ្វ្រែល។

តើខ្ញុំត្រូវធ្វើដូចម្តេច ប្រសិនបើខ្ញុំមានបណ្តឹងទាក់ទងនឹងការបោះឆ្នោត?
តាមច្បាប់បោះឆ្នោត ជាដំបូង អ្នកអាចធ្វើពាក្យបណ្តឹងទៅកាន់គណៈកម្មការបោះឆ្នោតឃុំ/សង្កាត់(គឃ/សប) ទីដែលបញ្ហានោះបានកើតឡើង។ ប្រសិនបើអ្នក មិនពេញចិត្តនឹងសេចក្តីសម្រេចរបស់ គឃ/សប អ្នកអាចប្តឹងតវ៉ាទៅកាន់គណៈកម្មការជាតិបោះឆ្នោតរាជធានី/ខេត្ត(គធ/ខប)។ ប្រសិនបើអ្នកនៅតែមិនពេញចិត្ត នឹងសេចក្តីសម្រេចនេះ អ្នកអាចប្តឹងតវ៉ាបន្តទៅកាន់គ.ជ.ប។ ក្រៅពីនេះ អ្នកក៏អាចធ្វើពាក្យបណ្តឹងដោយផ្ទាល់ទៅកាន់ក្រុមប្រឹក្សារដ្ឋធម្មនុញ្ញផងដែរ។

តើខ្ញុំអាចទទួលបានចំណេះដឹងទាក់ទងនឹងការបោះឆ្នោតបន្ថែមទៀតតាមវិធីណា?
មានក្រុមមួយចំនួននៅកម្ពុជា ដែលមានកម្មវិធីទាក់ទងនឹងការអប់រំអ្នកបោះឆ្នោត។ ខាងក្រោមនេះគឺជាឧទាហរណ៍មួយចំនួន អំពីក្រុមទាំងនោះ៖ គណៈកម្មាធិការ ជាតិរៀបចំការបោះឆ្នោត: http://www.necelect.org.kh/nec_english/

កម្មវិធីឡូយ៩ របស់ប៊ីប៊ីស៊ី(កម្មវិធីវិទ្យុនិងទូរទស្សន៍ដែលមានគោលដៅចែករម្លែកពត៌មានទាក់ទងនឹងការចូលរួមរបស់ពលរដ្ឋ ដោយរួមទាំងការបោះឆ្នោតផង)៖http://www.bbc.co.uk/mediaaction/publicationsandpress/research_cambodia_loy9_page.html

គណៈកម្មាធិការដើម្បីការបោះឆ្នោតដោយសេរីនិងយុត្តិធម៌នៅកម្ពុជា ហៅកាត់ខុមហ្វ្រែល:
http://www.comfrel.org/eng/index.php?option=com_content&view=category&layout=blog&id=136&Itemid=1054

(អត្ថបទនេះត្រូវធ្វើបច្ចុប្បន្នភាពចុងក្រោយនៅថ្ងៃទី៧ ខែសីហា ឆ្នាំ២០១៣)

Milan Tomic

Hi. I’m Designer of Blog Magic. I’m CEO/Founder of ThemeXpose. I’m Creative Art Director, Web Designer, UI/UX Designer, Interaction Designer, Industrial Designer, Web Developer, Business Enthusiast, StartUp Enthusiast, Speaker, Writer and Photographer. Inspired to make things looks better.