ទីភ្នាក់ងារបារាំងនឹងជួយដាក់ទុនឲ្យពាណិជ្ជករម៉ាស៊ីនកិនស្រូវនៅកម្ពុជា

ទីភ្នាក់ងារបារាំង សម្រាប់ការអភិវឌ្ឍ (AFD) នឹងជួយដាក់ទុនឲ្យពាណិជ្ជករម៉ាស៊ីនកិនស្រូវនៅកម្ពុជា ដោយការបណ្ដាក់ទុននេះ គីឲ្យខ្ចីប្រាក់ប្រមាណពី ១០លាន ទៅ ១៥លានដុល្លារសហរដ្ឋអាមេរិក ក្នុងការទិញម៉ាស៊ីនកិនស្រូវ ដែលអាចកិនអង្ករបានល្អប្រកបដោយស្តង់ដារអន្តរជាតិ សម្រាប់នាំចេញទៅទីផ្សារសហគមន៍អឺរ៉ុបបាន។

ដោយ ខែ សុណង
2010-10-02

h100110ko

កម្មករច្រកស្រូវចូលបាវសម្រាប់នាំចេញនៅក្រៅប្រទេស នៅក្នុងកសិដ្ឋានមួយកន្លែង ស្ថិតក្នុងស្រុកមោងឫស្សី ខេត្តបាត់ដំបង កាលពីថ្ងៃទី៧ ខែធ្នូ ឆ្នាំ២០០៩។

RFA Photo

នៅក្នុងសន្និសីទសារព័ត៌មាន បន្ទាប់ពីសិក្ខាសាលាលទ្ធផលនៃដំណើរទស្សនកិច្ចរបស់ពាណិជ្ជករម៉ាស៊ីន កិនស្រូវកម្ពុជា ស្វែងយល់ពីទីផ្សារស្រូវអង្ករនៅអឺរ៉ុប នៅថ្ងៃសុក្រទី១ ខែតុលា រដ្ឋលេខាធិការក្រសួងពាណិជ្ជកម្ម លោក ម៉ៅ ថូរ៉ា់ មានប្រសាសន៍ថា ដោយសារតែម៉ាស៊ីនកិនស្រូវនៅកម្ពុជា មិនទាន់អាចឆ្លើយតបទៅតាមតម្រូវការទីផ្សារអឺរ៉ុបនោះ ទើបទីភ្នាក់ងារបារាំង សម្រាប់ការអភិវឌ្ឍ មានគម្រោងផ្ដល់ឥណទានមកដល់ពាណិជ្ជករម៉ាស៊ីនកិនស្រូវ ដើម្បីទិញម៉ាស៊ីនកិនស្រូវ។
លោក ម៉ៅ ថូរ៉ា់ បន្តថា លោកជឿជាក់ ប្រសិនបើប្រើការថវិកានេះបានត្រឹមត្រូវ ទីភ្នាក់ងារបារាំង នឹងបន្តជួយមកកម្ពុជាបន្ថែមទៀតនៅពេលក្រោយ។
លោក ម៉ៅ ថូរ៉ា់ បានបញ្ជាក់ទៀតថា បច្ចុប្បន្នកម្ពុជាមានរោងម៉ាស៊ីនកិនស្រូវធំៗ ប្រមាណជា ៤ ឬ ៥ប៉ុណ្ណោះ ដែលអាចកិនយ៉ាងច្រើនបំផុតបាន ១០ម៉ឺនតោន។
ប្រទេស កម្ពុជា កាលពីឆ្នាំ២០០៩ បាននាំអង្ករចេញទៅទីផ្សារអឺរ៉ុបបានជាង ២ម៉ឺន១ពាន់តោន ហើយទិសដៅរបស់រដ្ឋាភិបាលកម្ពុជា មានគម្រោងនាំអង្ករចេញទៅបរទេសឲ្យបាន ១លានតោននៅឆ្នាំ២០១៥។
អគ្គនាយកក្រុមហ៊ុន ហ្គ្រីន ត្រេដ (Green Trade) លោក ធន វីរៈ បានថ្លែងថា ទីផ្សារស្រូវនៅកម្ពុជា កំពុងមានការកើនឡើង បរិមាណអង្ករកម្ពុជាកើនយើងអាចនាំចេញបាន ហើយមានអ្នកបញ្ជាទិញជាបន្តបន្ទាប់។ លោកថា ក្នុងឆ្នាំ២០០៣ កម្ពុជាបាននាំអង្ករចេញទៅសហគមន៍អឺរ៉ុបបានចំនួនប្រមាណ ១ពាន់តោន ហើយឆ្នាំ២០០៩ បានកើនឡើងចំនួន ៥ពាន់តោន។
លោក ធន វីរៈ បន្តថា ការនាំអង្ករចេញទៅក្រៅប្រទេសច្រើន មិនបានធ្វើឲ្យប៉ះពាល់ដល់ការផ្គត់ផ្គង់ទីផ្សារក្នុងស្រុកនោះទេ ដោយសារតែការនាំចេញនោះ គឺប្រើប្រាស់តែក្នុងចំនួនស្រូវលើសតម្រូវការក្នុងស្រុកតែប៉ុណ្ណោះ។
ប្រភពពីមន្ត្រីក្រសួងពាណិជ្ជកម្មឲ្យដឹងថា ប្រទេសដែលប្រកួតប្រជែងជាមួយកម្ពុជា នៅពេលអនាគត គឺមានតែប្រទេសថៃ និងប្រទេសវៀតណាមទេ ដែលគេមានមធ្យោបាយដឹកជញ្ជូននៅជាប់សមុទ្រល្អជាងកម្ពុជាច្រើន។
ក្នុងការជជែកពិភាក្សានេះបានលើកឡើងថា ដើម្បីទទួលបានជោគជ័យនៅក្នុងការបញ្ចូលផលិតផលទៅក្នុងទីផ្សារនៅ អឺរ៉ុប គឺកម្ពុជាមានបញ្ហាចម្បង២ ដែលត្រូវដោះស្រាយ គឺទី១ កែលម្អគុណភាពអង្ករដើម្បីបំពេញតាមស្តង់ដារអឺរ៉ុប ទី២ កម្ពុជាត្រូវបង្កើតទំនាក់ទំនងខាងជំនួញ និងចាប់ផ្ដើមកសាងភាពជាដៃគូ ដែលអាចទុកចិត្តបានជាមួយក្រុមហ៊ុននាំចូលអង្ករនៅអឺរ៉ុប។
ប្រទេសដែលជាទីផ្សារអង្ករធំជាងគេនៅអឺរ៉ុប គឺប្រទេសប៉ូឡូញ និងប្រទេសរុស្ស៊ី។
តម្រូវការអង្កររបស់សហគមន៍អឺរ៉ុប ដែលមានសមាជិកចំនួន ២៧ប្រទេស ក្នុងឆ្នាំ២០១០ គឺចំនួន ២លាន៤សែនតោន ហើយកាលពីឆ្នាំ២០០៩ កម្ពុជានាំអង្ករចេញទៅអឺរ៉ុបបានចំនួន ២ម៉ឺន១ពាន់តោន៕

Milan Tomic

Hi. I’m Designer of Blog Magic. I’m CEO/Founder of ThemeXpose. I’m Creative Art Director, Web Designer, UI/UX Designer, Interaction Designer, Industrial Designer, Web Developer, Business Enthusiast, StartUp Enthusiast, Speaker, Writer and Photographer. Inspired to make things looks better.